{{{{حبك وراني اليول }}}} احلى قصه رمانسيه

اهلين كيفكم حبيت انزل اول روايه لي من تاليفي وبالوقت الحالي بنزل الجزء
الاول واذا شفت قبول وتشجيع منكم راح انزل كل بين فتره وفتره جزء بس قبل ابي
رايكم وبصراحه يعني بدون مجاملات واذا ماعجبتكم قولولي عشان اوقفها اتفقنا




((( حبك وراني الويل )))

[عائلة راشد]

الاب"راشد":رجل على قد حاله ساكن في القصيم وعايش على راتبه وعلى
ايجار بيته اللي ماجر الدور الاول بعد ماكان من كبار التجار وخسر ثروته بيوم
وليله...

الام"فوزيه":زوجه مكافحه ضحت بمالها وحلالها لتساعد زوجها بازمته طيبه وعلى نياتها
زوجها واولادها هم اغلى شي عندها...

البنت الكبيره"ريما":عمرها 19وتدرس في ثالث ثانوي حلوه ومؤدبه وقريبه من ابوها مره ودلوعة امها...

البنت الوسطى"ريناد":عمرها 14 تدرس بثاني متوسط مملوحه بس تغار من ريما لانها احلى منها ومحبوبه اكثر منها...

الولد الصغير"بندر":عمره 12 يدرس في سادس ابتدائي الولد الوحيد طيب وحنون ...

[عائلة صالح]

الاب"صالح":اخو راشد الكبير غني مره ومايحب اخوه ولا يحب الخير له بس يحب المظاهر كثير و يظهر قدام الناس انه
العكس يعني يحب اخوه....
الام"قماشه":قمه في الغرور والتكبر شايفه نفسها على الناس وتعاملها مع اولادها رسميه بس تحب على بنتها الصغيره لانها طالعه
عليها...

الولد الكبير"مازن":متزوج عمره 33 يشتغل مع ابوه في شركتهم زوجته "مها" وعنده ولدين"نواف"و"نايف"...

الولد الاوسط"تركي":عمره 26 شاب لاهي وعابث متخرج من جامعة اكسفورد مايهتم بالعادات والتقاليد عصبي مره واذا عصب
مايرحم ومع كذا حساس وحنين...

البنت الصغيره"عبير":عمرها 19 تدرس في ثالث ثانوي شايفه نفسها وماتحب احد وتفكر تسافر لكندا عشان تكمل دراستها هناك...








<<< الجزء الاول>>>

ابو بندر:يالله ياام بندر جهزي الشنط بنمشي بعد صلاة العصر وترا كلمت اخوي ابو مازن وقلتله ان كان يقدر يسكننا عنده الين
نلقى شقه وانه وافق نسكن في الملحق يقول عشان حرمتك وبناتك ياخذون راحتهم وانا وافقت هاه وش رايك؟؟
ام بندر:الله يهديك ياراشد ماودنا نسكن عندهم مالي خلق قماشه وتكبرها علي هي وبنتها مااقول الا الله يعينني بس ...
وبهذي اللحظه دخلت ريما وهي شايله شنطتها وتشوف امها وابوها يتناقشون بخصوص السكن...
قالت لامها:مايخالف يمه تحملي كم يوم لين مانشوف لنا شقه وبعدين مهما كان هذا عمي ولازم نتحمل ايش بنسوي ...
قال ابوها:خلاص ياريما قفلي على الموضوع و يلا بطلع اذا خلصتو تعالو في السياره...
,,,,,,,,,,,,,,,,,,,,,,,,,,,,,,,,,,,,,,
وبنفس الوقت في الرياض وفي بيت كبير ويقع على ارقى احياء الرياض كان صالح وقماشه يتهاوشون بخصوص سكن
راشد وعايلته عندهم ...
قماشه:قلتلك مابيهم يجون في بيتي مرة اخوك بالذات مابي اشوفها مااحبها مااطيقها...
صالح:خلاص انا قلت لاخوي وماودي ارجع بكلمتي وبعدين هم بيسكنون في الملحق وكلها كم يوم ويروحون تحمليهم
علشان خاطري...
قماشه:اووووف خلاص بتحملهم بس مو علشانك ولا علشانهم ...
صالح:اجل عشان مين؟؟!
قماشه:علشان الناس مايتكلمون عني وعنك بس هاه قل لاخوك لايتعدون الملحق مابيهم يدخلون جوا بيتي ولا ترا ابطردهم
فاااااااهم...
صالح:خلاص خلاص ياام مازن مايصير خاطرك الا طيب والحين روحي ياحبيبتي قولي للخدم يرتبون الملحق لانهم على
وصول ...
راحت ام مازن تقول للخدم وهي طالعه شافت عبير لابسه وكاشخه شكلها بتطلع ولما شافتها نادتها
ام مازن:عبوره
عبير:هاي ماما
ام مازن:وين رايحه ياحبيبتي؟
عبير:ماما صديقتي ميشو(مشاعل)مسويه بارتي في الشيراتون وتخيلي ياماما مين جايبه تحيي البارتي
ام مازن(وهي متحمسه):ميييييييين؟؟؟
عبير:اليسسسسسسسا
ام مازن:واااااو اليسا خلاص ياماما روحي ولاتنسي تصوري مع اليسا وسلميلي على ميشو ولاتتاخري ياحبيبة قلبي
راحت عبير وضمت امها وطلعت وقماشه راحت تقول للخدم
,,,,,,,,,,,,,,,,,,,,,,,,,,,,,,,,,,,,,,,
_تركي تركي شف هالبنت هذي مانزلت عينها عنك رح رقمها بسرعه تراها ماتتفوت...
التفت تركي على المكان اللي يأشر عليه خويه ورجع يشوف خويه وقاله
تركي:ووووووع الله يقرفك هذي قرويه انا مااحب هالاشكال هذي وبعدين هذي متغطيه وانا مااحب المتغطيات لانهم يغطون
قبحهم...
طلال:ياااااااي بعدين انت ماتحب المتغطيات على قولتك يعني ماتحب امك وخواتك؟؟!
تركي:لا اصلا امي واختي مايتغطون واذا تغطوا انا اهاوشهم ابغى الناس يشوفون ان اهلي حلوين...
طلال بينه وبين نفسه(الحمدلله والشكر وين الرجوله معه)وبعدها التفت على تركي وقاله:اي صح لامايصير يتغطون
بعدين الناس يقولون ان اللي معك شيون...
تركي:طيب لايكثر ويلا خلنا نروح للمطعم تراني ميت جوووووع...
,,,,,,,,,,,,,,,,,,,,,,,,,,,,,,,,,,,,,
مازن (وهو معصب):قلتلك مابي اروحلهم انتي ماتفهمين...
مها:مهما كان يامازن هذولا اهلك ولازم تاصلهم امك وابوك زيارتهم واجبه عليك...
مازن:يامها انتي تعرفين اهلي زين ماتعجبني حالهم ابدا لاابوي ولاامي ولا اخواني لاهين بدنياهم ولايهتمون بفروضهم وانا
اذا رحتلهم يضيق صدري...
مها:ولو انت رح لو ربع ساعه بس عشان ترضي ربك وتاصلهم وادع لهم بالهدايه ...
,,,,,,,,,,,,,,,,,,,,,,,,,,,,,,,,,,,,,,,,,,,,
وصلت عايلة ابو بندر للرياض واتجه مباشره لبيت اخوه وكانت الساعه حوالي الثمانيه ونص فتحت الخدامه لهم راح ابو بندر
وبندر لمجلس الرجال وام بندر والبنات رحو للصاله وبعد ربع ساعه دخلت ام مازن عليهم...
ام مازن(ببرود):اهلين ام بندر كيفك...
ام بندر:الحمدلله بخير ياام مازن شلونكم وشلون العيال عساهم طيبين ومازن ومرته بشرينا عنهم ...
ام مازن:الحمدلله والتفتت على البنات وكملت كلامها:هاه يابنات كيفكم ماشاءالله كبرتو واحلويتو...
البنات:الحمدلله طيبين ياخالتي...
ريناد:اقول خالتي وين عبير ماشفناها...
ام مازن بينها وبين نفسها(لو تدري عبير انك سألتي عنها كان تنتحر)قالت:طالعه معزومه عند صديقتها...
ام بندر:الله يهديك ياام مازن شلون تخلين البنت تطلع بروحها ماتخافين عليها ...
ام مازن (وهي معصبه):الحمدلله بنتي متربيه زين وبعدين هي ماراحت مكان غريب هي راحت لصديقتها
وخليك في حالك احسن ياام بندر...
ريما حست إن الجو متكهرب بين امها وزوجة عمها فحبت تغير الموضوع التفت على ام مازن وقالت:خالتي وين عمي
ودنا نسلم عليه...

راحت ام مازن عند السنترال ودقت رقم المجلس ورد عليها زوجها وقالتله إن البنات بيجون يسلمون عليه قالها خليهم يجون
مافي احد غريب سكرت ام مازن التليفون ولفت على البنات وقالتلهم روحو للمجلس مافيه احد غريب...
قامو البنات وراحو لمجلس الرجال طقو الباب ودخلو يسلمون ...

ابو مازن:هلا والله ببنات اخوي ماشاءالله كبرتو هالثلاث السنين اللي ماشفتكم فيها غيرتكم علينا شلونكم يابنات عساكم طيبين...
ريما:الحمدلله ياعمي حنا بخير ...

تفحص ابو مازن ريما وهو يقول بينه وبين نفسه(ماشاءالله ياريما والله واحلويتي ماتوقعت بنات اخوي بيصيرون مزايين كذا)

وكانت ريما فعلا حلوه كانت طويله وجسمها متناسق مع طولها شعرها طويل وناعم واسود عيونها وساع وفمها صغير وخشمها
دقيق كانت من جد ملكة جمال عكس اختها ريناد اللي كانت قصيره شوي ومربربه شعرها قصير بني كانت مملوحه بس مو زي
ريما...

نرجع لابو بندر وكان يناظر ريناد وقال:و هذي يابومازن ريناد تراها تحبك مره وكل يوم تقولي يابابا ودنا لعمي ...
ابو مازن:بعدي والله وانا احبها بس لو تنحف وتخفف هالشحيمات كان احبها اكثر...

انحرجت ريناد من كلام عمها وابوها حز في نفسه اإن اخوه يقول عن بنته كذا بس سكت وماعلق ... قام ابو مازن وطلع
لانه بيروح عنده شغل وجلس راشد مع بناته شوي وبعدين قالهم يروحون لأمهم وهو بيطلع يدور سكن بأقرب وقت لأنه حس
إن اخوه مايبيهم مع إنه يجاملهم ويحاول يظهر لهم العكس بس مع كذا حس ابو بندر إنهم غير مرغوب فيهم...
,,,,,,,,,,,,,,,,,,,,,,,,,,,,,,,,,,,,,,,,,,,,,
وفي الشيراتون وبالتحديد في صالة الافراح كانت عبير ترقص يمين ويسار مع صديقاتها وتضحك وشافت مشاعل وهي
تناديها من بعيد نزلت من منصة الرقص واتجهت لمشاعل بتشوف ايش عندها ...
عبير:اووووووف ياميشو وشفيك تناديني بسرعه خير فيه شي؟؟؟
مشاعل:لاابد بس تعالي ارتاحي شوي طول الوقت وانتي ياواقفه ياترقصين...
عبير:نعم نعم وعشان كذا مزعجتني تعالي تعالي بس عشان ارتاح صدق ماعندك سالفه ...
مشاعل:لا عندي سالفه تبين تتعبين زي هذيك المره لما كنا في دي جي رهف وتعبتي من كثر الرقص والتنطيط ودقت امك علي
وهاوشتني لاياحبيبتي ارتاحي شوي وبعدين روحي كملي ...
عبير:طيب ابجلس هه...
وبفس اللحظه رن جوال عبير طلعت جوالها من شنطتها وشافت رقم امها وردت:اهلين ماما...
ام مازن:عبير وينك ليش مارديتي دقيت كثير...
عبير:لاماما مافي شي بس ماسمعته عشان الميوزيك...
ام مازن:طيب متى بترجعين ترا عمك راشد واهله جو اليوم من القصيم...
عبير:يييع ليش يجون لاتقولي بيسكنون عندنا ترا اموت لو سكنوا اف قرف...
ام مازن:بسم الله عليك انشالله هم ولاتخافي هم بيسكنون عندنا مؤقتا وبعدين يروحون المهم حبيبتي لاتتأخرين يعني الساعه4
الفجر تكونين في البيتok
عبير:ok mama باااااي...
سكرت عبير من امها وراحت تكمل رقصها
,,,,,,,,,,,,,,,,,,,,,,,,,,,,,,,,,,,,,,,,,,
دخلو للملحق وشافوه كبير ومرتب وفيه غرفتين نوم وصاله صغيره وحمام ومطبخ صغير قسمو الغرف بينهم البنات وبندر
بغرفه والام والاب بغرفه ناموا ولما جت الساعه5ونص الفجر قام ابو بندريتوضا ويصلي وهو طالع للمسجد شاف سياره
رنج روفر وقفت عند الباب ونزلت بنت كاشفه عرف إنها عبير بس ماحب يبين لها إنه شافها كمل طريقه للمسجد وهي شافته
وعرفت إنه عمها بس مااهتمت دخلت للبيت وراحت فوق لغرفتها عشان تنام...رجع ابو بندر من المسجد ودخل للملحق
شاف ام بندر في المطبخ تجهز الفطور ومعها ريما...
ابو بندر:صباح الخير...
ام بندر:صباح النور هلا يلا رح للصاله عشان اجيب لك الفطور والتفتت على ريما وقالتلها:ريما يمه روحي للمطبخ اللي
جوا البيت وجيبي سكر وملاعق...
ريما:اخاف يمه فيه احد من عيال عمي...
ابو بندر:لاماظن كلهم نايمين هذولا مايصحون الا المغرب...
طلعت ريما من الملحق ودخلت للمطبخ وانصدمت.........

وشصار لريما في المطبخ وخلاها تنصدم؟؟؟
وسكن عايلة ابو بندر عند اخوه هل بيطول؟؟؟
عبير وش بيصير لها؟؟؟



إنتهى الجزء الاول وزي ماقلتلكم اذا اعجبتكم انزل الجزء الثاني واذا مااعجبتكم اوقفها


وووووووومشكورين

هايله ياسر كملي طبعا

وشكرا على مجهودك